شاہ سلمان نے یمنی سیامی بچوں کو ریاض منتقل کرنے کی ہدایت کردی

خادم حرمین شریفین شاہ سلمان بن عبد العزیز نے یمنی سیامی بچوں مودہ اور رحمہ کو ریاض  کے کنگ عبد العزیز میڈیکل سٹی منتقل کرنے کی ہدایت کی ہے۔

سعودی پریس ایجنسی کے مطابق میڈیکل سٹی کے ماہرین سیامی بچوں کو علیحدہ کرنے کے امکانات کا جائزہ لیں گے۔

ایوان شاہی کے مشیر اور کنگ سلمان ادارہ برائے انسانی امداد کے سربراہ ڈاکٹر عبد اللہ بن عبد العزیز الربیعہ سیامی بچوں کو علیحدہ کرنے والی میڈیکل ٹیم کے سربراہ ہوں گے۔

ڈاکٹر عبد اللہ بن عبد العزیز الربیعہ نے کہا ہے کہ ’شاہ سلمان کی طرف سے جاری ہونے والی ہدایت دراصل ان کی انسانیت نوازی کی عکاسی کرتی ہے‘۔

’شاہ سلمان نے اس سے پہلے بھی کئی مرتبہ متعدد سیامی بچوں کو علیحدہ کرنے کے لیے خصوصی دلچسپی ظاہر کی ہے‘۔

واضح رہے کہ کنگ عبد العزیز میڈیکل سٹی میں اس سے پہلے کئی سیامی بچوں کو کامیابی کے ساتھ علیحدہ کیا گیا ہے۔