مسجد الحرام میں عمرہ زائرین کے لیے 100 دروازے کھول دیے گئے

سعودی عرب میں حرمین شریفین انتظامیہ نے زائرین کے بڑھتے ہوئے رش کو دیکھتے ہوئےعمرہ زائرین کی آمد و رفت کو آسان بنانے کےلیے مسجد الحرام میں 100 دروازے کھول دیے ہیں۔

سبق ویب سائٹ کے مطابق انتظامیہ نے بیان میں کہا کہ’ یہ فیصلہ اژدہام کو روکنے اور گھٹن کے واقعات سے بچنے کےلیے کیا گیا ہے۔ اس سلسلے میں مسجد الحرام کی سپیشل سیکیورٹی فورس کے ساتھ رابطہ ہے‘۔  

حرمین شریفین انتظامیہ نے ٹویٹر پر بیان میں کہا کہ ’مسجدالحرام کے 100 دروازے کھولنے سے زائرین اورعمرے کےلیے آنےوالوں کو بڑی سہولت ہو گی۔ زائرین آسانی سے آجاسکیں گے‘۔

یاد رہے کہ  حرمین شریفین انتظامیہ زائرین کو رمضان کے دوران متعدد سہولتیں فراہم کر رہی ہے۔ کورونا سے بچاو کےلیے بھی اقدامات کیے گئے ہیں۔  

سرکاری خبر رساں ایجنسی ایس پی اے کے مطابق مسجد الحرام کے صحنوں کی صفائی دھلائی، سینیٹائزنگ، معذور، بزرگ اور مریض زائرین کو گالف گاڑیوں کے ذریعے ایک جگہ سے دوسری جگہ لانے لے جانے کا انتظام ہے۔ مسجد الحرام کے دروازوں سے آمدو رفت کےعمل کو منظم کیا جا رہا ہے۔