وزیراعظم عمران خان آج رات قوم سے خطاب کریں گے: فواد چوہدری

پاکستان کے وزیراعظم عمران خان آج (جمعرات) رات قوم سے خطاب کریں گے۔

وفاقی وزیر اطلاعات فواد چوہدری نے جمعرات کو اپنی ٹویٹ میں بتایا کہ وزیراعظم آج رات قوم سے خطاب کریں گے۔

واضح رہے کہ بدھ کو وزیر داخلہ شیخ رشید نے ایک پریس کانفرنس کے دوران کہا تھا کہ وزیراعظم قوم سے خطاب کریں گے، بعد ازاں حکمران جماعت تحریک انصاف کے سینیٹر فیصل جاوید نے ٹوئٹر پر اطلاع دی کہ وزیراعظم کا خطاب ملتوی ہو گیا ہے۔

دوسری جانب وزیراعظم نے آج قومی سلامتی کمیٹی کا اجلاس بھی طلب کر رکھا ہے۔

گزشتہ روز فواد چوہدری نے کہا تھا کہ ’وزیراعظم عمران خان سے آرمی چیف کی بدھ کو دو مرتبہ ملاقات ہوئی ہے، کسی نے ان سے استعفیٰ مانگا اور نہ وہ استعفیٰ دیں گے۔‘

بدھ کو اسلام آباد میں میڈیا سے بات کرتے ہوئے فواد چوہدری نے کہا کہ ’آج وفاقی کابینہ کے اجلاس میں دھمکی آمیز خط پیش کیا گیا۔ وزیراعظم عمران خان کی جانب سے ٹی وی اینکرز کو اس خط کے مندرجات بتائے گئے ہیں۔‘

ان کا کہنا تھا کہ ’اگلے مرحلے میں ہم پارلیمنٹ کے ان کیمرہ اجلاس میں یہ خط رکھ رہے ہیں۔‘

فواد چوہدری نے کہا کہ ’عمران خان لڑے گا، پاکستان کی حرمت کے لیے، پاکستان کی خود مختاری کے لیے اور پاکستانی قوم کی عزت کے لیے۔‘

ان کا کہنا تھا کہ ’آخری گیند تک گیم جائے گی۔ اس وقت 1992 کے ورلڈ کپ والی صورت حال ہے۔ لگ رہا ہے کہ ہم پیچھے ہیں لیکن ہم پیچھے نہیں ہیں۔ جب گیم پلٹے گی تو سب دیکھیں گے۔‘

انہوں نے کہا کہ ’تحریک انصاف کی بڑی واضح لائن ہے اور وہ لائن یہ ہے کہ پاکستان کی فوج استحام کی ضامن ہے۔ پاکستان کی نیشنل سکیورٹی کی ضامن ہے۔‘