وزیراعظم عمران خان اور صدر مملکت سے آرمی چیف کی الگ الگ ملاقات

وزیراعظم پاکستان عمران خان اور صدر مملکت ڈاکٹر عارف علوی سے پاکستانی فوج کے سربراہ جنرل قمر جاوید باجوہ نے الگ الگ ملاقات کی ہے۔

پیر کے روز وزیراعظم آفس سے جاری کردہ تفصیل کے مطابق ملاقات میں فوج سے متعلق پیشہ ورانہ امور پر تبادلہ خیال کیا گیا۔

وفاقی دارالحکومت اسلام آباد میں ہونے والی ملاقات سے متعلق مزید تفصیل جاری نہیں کی گئی ہے۔

قبل ازیں پیر ہی کے روز صدرِ مملکت ڈاکٹر عارف علوی سے چیف آف آرمی اسٹاف، جنرل قمر جاوید باجوہ نے ملاقات کی تھی۔

ایوان صدر کے مطابق ملاقات میں قومی سلامتی اور علاقائی صورتحال پر تبادلہ خیال کیا گیا۔ آرمی چیف نے صدر مملکت کو سیکورٹی فورسز کی پیشہ ورانہ تیاری، دہشت گرد عناصر کے خلاف اقدامات پر بریفنگ بھی دی۔

صدر مملکت کا کہنا تھا کہ قوم کو اپنی مسلح افواج کی قربانیوں پر فخر ہے، مسلح افواج نے تمام مشکلات کے باوجود ملکی سرحدوں کا دفاع کیا۔