لکھنو... وزیر اعظم نریندر مودی نے عدلیہ میں ٹیکنالوجی کے استعمال پر زور دیتے ہوئے کہا ہے کہ قانون کا مقصد ہر شہری کی فلاح و بہبود ہے۔ مودی نے الٰہ آباد ہائی کورٹ کے 150 ویں یوم تاسیس کی تقریب سے خطاب کرتے ہوئے کہا کہ ملک کے عوام اور عدالتوں پر سے بوجھ کم کرنے کی سمت میں کام کیا جا رہا ہے ابھی تک 1200 قوانین کو ختم کیا ہے۔ عدلیہ کے نظام میں ہماری جو ذمہ داری ہوگی اسے پورا کریں گے۔انہوں نے کہا کہ ٹیکنالوجی سے سب کا کام آسان ہو جائے گا۔ایس ایم ایس سے مقدمے کی تاریخ بھیجی جائے۔قانون صرف امیروں کیلئے نہیں ،قانون سب کےلئے ہے اور قانون سب کےلئے برابر ہونا چاہیے۔انہوں نے کہا کہ عدالت اور جیل کو جوڑا جائے تو مجرم نہیں بھاگ پائیں گے۔وزیر اعظم نے کہا کہ مجھے امید ہے کہ ملک کے سوا100 کروڑ لوگوں کا خواب ملک کو سوا سو کروڑ قدم آگے لے جا سکتا ہے۔ میں نے کہا تھا کہ یہ تو نہیں پتہ کہ کتنے قانون بناوں گا لیکن روز ایک قانون ختم کروں گا۔ اب تک ہم نے 1200 قانون ختم کر دیئے ۔
