یونیسکو نےعربی رسم الخط کو ثقافتی ورثے کی فہرست میں شامل کرلیا

سعودی وزیر ثقافت شہزادہ بدر بن فرحان نے کہا ہے کہ ’یونیسکو نے عربی رسم الخط کو اپنے ثقافتی ورثے کی فہرست میں شامل کر لیا ہے۔ سعودی عرب نے پندرہ عرب ممالک کی شراکت سے یہ اعزاز حاصل کیا ہے۔‘

سرکاری خبر رساں ایجنسی ایس پی اے کے مطابق شہزادہ بدر بن فرحان نے عربی رسم الخط کے یونیسکو کے غیر مادی ثقافتی ورثے کی فہرست میں شامل کیے جانے پر سعودی قیادت کو مبارکباد دی ہے۔

وزیر ثقافت کا کہنا تھا کہ ’عربی رسم الخط کا یونیسکو کے پاس ثقافتی ورثے کی فہرست میں اندراج وزارت کی فکر اور حکمت عملی کے عین مطابق ہے۔‘

وزارت اس حوالے سے متعدد اقدامات کر چکی ہے۔ 2020 اور2021 کے دوران عربی رسم الخط کا سال منایا گیا۔ اس سے یہ بات ریکاڈ پر آئی ہے کہ مملکت عربی رسم الخط کا عالمی مرکز ہے۔

سعودی وزارت ثقافت نے کہا کہ’ یونیسکو کے پاس عربی رسم الخط کے اندراج سے ثقافتی ورثے کو فروغ ملے گا۔ مختلف ملکوں میں عربی رسم الخط  پروان چڑھے گا۔‘ 

’عربی رسم الخط عرب تشخص کی علامت مانا جاتا ہے۔ اس کی بدولت تاریخ کے مختلف ادوار میں عربی ثقافت دنیا بھر میں منتقل کرنا ممکن ہو سکتا ہے۔‘

پیشہ ور خطاط عربی رسم الخط  کو آگے بڑھا رہے ہیں۔ آرٹسٹ اور ڈیزائنر بھی سنگ تراشی، دیواری آرٹ اور  فن پاروں میں عربی رسم الخط استعمال کر رہے ہیں۔

اسی طرح دستکار بھی عربی رسم الخط کے ذریعے اپنی مصنوعات کو مزین کرتے ہیں۔