سعودیوں کے نام سے غیرملکیوں کے کاروبار کے خاتمے کے لیے تفتیشی کارروائیاں

سعودی وزارت تجارت مکہ مکرمہ برانچ نے سعودیوں کے نام سے غیرملکیوں کے کاروبار کے انسداد کے لیے عوامی بازاروں اور کچی آبادیوں میں تفتیشی کارروائیاں کی ہیں۔

یہ وہ مقامات ہیں جہاں سعودیوں کے نام سے غیرملکیوں کے کاروبار کی پابندی کی خلاف ورزی کے بڑے امکانات ہیں۔ 

سبق ویب سائٹ کے مطابق وزارت تجارت نے اپنے بیان میں کہا کہ سعودیوں کے نام سے غیرملکیوں کے کاروبار کے انسداد کے قانون کی خلاف ورزی کرنے والوں کے لیے اصلاح کی مہلت باقی ہے۔ اس حوالے سے آگہی مہم بھی جاری رکھی جائے گی۔

وزارت تجارت نے بتایا کہ آگہی مہم وزارت بلدیات و دیہی و آباد کاری امور، وزارت افرادی قوت و سماجی بہبود، وزارت ماحولیات و پانی و زراعت اور زکوٰۃ، ٹیکس اینڈ کسٹم اتھارٹی کے اشتراک سے چلائی جا رہی ہے۔

وزارت تجارت کا کہنا ہے کہ مکہ مکرمہ ریجن کی تمام کمشنریوں میں آئندہ ہفتوں کے دوران آگہی مہم جاری رہے گی۔