مملکت میں چوبیس گھنٹے کے دوران کورونا کے 45 نئے مریض، ایک ہلاکت

سعودی عرب میں جمعہ 12 نومبر کو کورونا کے 50 سے کم نئے کیسز سامنے آئے ہیں جبکہ فعال کیسز کی تعداد میں بھی کمی آئی ہے۔ 

جمعے کو سرکاری خبر رساں ایجنسی ایس پی اے نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے 45 نئے مریض سامنے آئے جبکہ 60 افراد صحت یاب بھی ہوئے ہیں۔

وزارت صحت کے مطابق ’گذشتہ 24 گھنٹے کے دوران کورونا کا مزید ایک مریض چل بسا، جس کے بعد مرنے والوں کی مجموعی تعداد بڑھ کر آٹھ  ہزار 810 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز میں سے 53 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

اب تک پانچ لاکھ 49 ہزار 148 افراد میں کورونا وائرس کی تصدیق ہو چکی ہے، جن میں سے پانچ لاکھ 38 ہزار160 افراد صحت یاب ہو چکے ہیں۔

وزارت صحت کا کہنا ہے کہ ’اب تک چارکروڑ 65 لاکھ 89 ہزار930 کورونا ویکسین کی خوراکیں دی جا چکی ہیں۔‘