سعودی محکمہ انسداد منشیات کے ترجمان محمد النجیدی نے کہا ہے منشیات سمگلنگ کی کوشش ناکام بنا کر ایک لاکھ 40 ہزار200 نشہ آورگولیاں ضبط کی گئی ہیں۔
عکاظ اخبارکے مطابق ترجمان نے کہا کہ محکمہ انسداد منشیات کے اہلکار نشہ آور گولیوں کی سمگلنگ اور استعمال کے انسداد کے لیے غیرمعمولی اقدامات کررہے ہیں۔
ترجمان نے بتایا کہ تین سعودی شہری اور وزٹ ویزے پر آئے ہوئے شامی کو جدہ میں شک کی بنیاد پر روکا گیا تھا۔ تلاشی لینے پر ان کے قبضے سے نشہ آور گولیاں برآمد ہوئیں۔
ترجمان کے مطابق چاروں ملزمان کو ابتدائی قانونی کارروائی کے بعد پبلک پراسیکیوشن کے حوالے کردیا گیا۔
