چوبیس گھنٹے میں کورونا کے 51 نئے مریض، مزید دو اموات

سعودی عرب میں پیر 25 اکتوبر کو کورونا کے 50 سے زیادہ  نئے کیسز سامنے آئے ہیں جبکہ فعال کیسز کی تعداد میں کمی آئی ہے۔ 

پیر کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے 51 نئے مریض سامنے آئے جبکہ 56 افراد صحت یاب بھی ہوئے ہیں۔

وزرات صحت کے مطابق ’گذشتہ 24 گھنٹے کے دوران کورونا کے مزید 2 مریض چل بسے، جس کے بعد مرنے والوں کی مجموعی تعداد بڑھ کر آٹھ  ہزار 780 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز میں سے 77 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

اب تک پانچ لاکھ 48 ہزار 303 افراد میں کورونا وائرس کی تصدیق ہو چکی ہے، جن میں سے پانچ لاکھ 37 ہزار 338 افراد صحت یاب ہوچکے ہیں۔

وزارت صحت کا کہنا ہے کہ اب تک چار کروڑ 54 لاکھ 24 ہزار344 کورونا ویکسین کی خوراکیں دی جا چکی ہیں۔