مملکت کے 4 علاقوں میں بارش کا امکان

موسمیات کے قومی مرکز کا کہنا ہے کہ مملکت کے4 علاقوں میں آج گرج چمک کے ساتھ بارش کا قوی امکان ہے ـ بعض مقامات پر گرد آلود ہوائیں چلنے سے شاہراہوں پر حد نگاہ بھی متاثر ہوسکتی ہے ـ

عاجل ویب نیوز نے موسمیات کے قومی مرکز کے حوالے سے مزید کہا ہے کہ مملکت کے بالائی مقامات ، جازان ، اور عسیر ریجن کے متعدد علاقوں میں گرج چمک کے ساتھ تیز بارش کا امکان ہے ـ

محکمہ کے مطابق ریاض کے علاقے الافلاج ، الخرج ، الدلم ، الرین ، القویعیہ ، حوطہ بنی تمیم ، السلیل ، وادی الدواسر ، الدوادمی اور عفیف جبکہ مکہ مکرمہ ریجن کے علاقے الخرمہ ، لمویہ ، تربہ اور رنیہ میں آج موسم غبار آلود رہے گا ـ

موسم کی خرابی کے باعث شاہراہوں پر گرد وغبار سے حدنگاہ متاثر ہوسکتی ہےـ

دوسری جانب ماہر موسمیات نزیہ الحیزان کا کہنا ہے کہ مملکت کے مغربی ، مشرقی اور وسطی علاقوں میں گرمی برقرار رہے گی جس میں بتدریج کمی واقع ہونے کا امکان ہے ـ

الحیزان کا مزید کہنا تھا کہ  مملکت کے شمالی بالائی علاقے ، مدینہ منورہ ریجن ، حائل اور تبوک ریجن میں دوپہر کے بعد بادل چھا جائیں گے جس سے موسم میں خوشگوار تبدیلی کی توقع ہے