کورونا کیسز میں کمی کا سلسلہ جاری ، 57 نئے مریضوں کی تصدیق

سعودی عرب میں کورونا وائرس کے کیسز میں کمی کا سلسلہ جاری ہے ـ گزشتہ 24 گھنٹے کے دوران مملکت کے مختلف ریجنز میں کووڈ 19 وائرس سے متاثرہ 57 افراد کی تصدیق ہوئی جبکہ ایک ہی روز میں 5 افراد اس مہلک وائرس سے جان کی بازی ہار گئے ـ

سعودی خبررساں ایجنسی نے وزارت صحت کی جانب سے جاری اعداد وشمار کے حوالے سے کہا ہے کہ مملکت میں اب تک کورونا کے مجموعی کیسز کی تعداد 5 لاکھ 46 ہزار 792 تک پہنچ گئی ـ

کورونا سے ایک ہی دن میں 72 افراد صحتیاب ہوئے جس کے ساتھ اب تک اس وبائی مرض سے شفایاب ہونے والوں کی مجموعی تعداد 5 لاکھ 35 ہزار 783 ہو گئی ـ

وزارت صحت کا کہنا ہے کہ جمعرات کو کورونا سے سب سے زیادہ مریض ریاض ریجن میں سامنے آئے جن کی تعداد 19 رہی جبکہ مکہ مکرمہ ریجن میں 11 افراد اس وائرس میں مبتلا پائے گئے ـ

مشرقی ریجن اور مدینہ منورہ میں 6 ، چھ افراد میں کورونا وائرس کی تصدیق ہوئی جبکہ جازان اور عیسر ریجنز میں مریضوں کی تعداد 3 ، تین رہی ـ

قصیم ، نجران اور تبوک ریجنزمیں 2 ، دو افراد میں کورونا وائرس کا ٹیسٹ مثبت آیا جبکہ حائل ، الجوف اور شمالی حدود ریجنز میں ایک ایک شخص میں کورونا وائرس کی تصدیق ہوئی ـ

وزارت صحت کا کہنا ہے کہ مملکت کے مختلف ریجنز میں کورونا کے ایکٹیو کیسز کی تعداد 2 ہزار 325 ہے جن میں سے 279 کی حالت نازک ہے جنہیں انتہائی نگہداشت کے یونٹ میں رکھا گیا ہے ـ

وزارت صحت کا کہنا ہے کہ کورونا سے بچاو کےلیے احتیاطی تدابیر پرعمل کرنا اشد ضروری ہے جن میں سماجی فاصلے کے اصول اور ہاتھوں کی مسلسل صفائی کے ساتھ عوامی مقامات پرماسک کا استعمال شامل ہے ـ

کورونا سے بچاو کےلیے مملکت کے تمام ریجنز میں ویکسینیشن کا عمل جاری ہے اس ضمن میں وزارت صحت کی ’توکلنا ایپ‘ کے ذریعے ویکسین لگوانے کے لیے وقت حاصل کرنے کی سہولت تاحال جاری ہے ـ