گھر میں نقب لگا کر 30 ہزار ریال چوری کرنے والے غیر ملکی گرفتار

سعودی عرب میں جدہ پولیس نے چوری کی وارداتوں میں ملوث 6 رکنی غیر ملکی گروہ کوگرفتار کیا ہے۔

ملزمان نے ایک مکان میں نقب لگا کر وہاں سے 30 ہزار ریال چوری کیے تھے۔

سبق نیوز کے مطابق مکہ ریجن کے پولیس ترجمان کا کہنا ہے کہ جدہ کمشنری میں پولیس کو اطلاع ملی تھی کہ ایک مکان میں چوری کی گئی جس پر کرائم برانچ نے تحقیقات کا آغاز کردیاـ 

پولیس ترجمان کا مزید کہنا تھا کہ تحقیقاتی ٹیم جلد ملزمان تک پہنچ گئی۔ گرفتار ملزمان کی تعداد 6 ہے جن کی عمریں تیس اور چالیس برس کے درمیان ہیں ـ 

ملزمان کے قبضے سے 16 ہزارریال برآمد کرلیے گئے جبکہ ان کے خلاف چوری کا مقدمہ درج کرکے مزید تحقیقات کےلیے انہیں ادارہ پراسیکیوشن کے حوالے کردیا گیا ـ کیس مکمل کرنے کے بعد مقدمہ فوجداری عدالت میں جمع کرایا جائے گاـ