کورونا کے ایک ہزار187 نئے مریض، مزید 14 اموات

سعودی عرب میں جمعہ 30 جولائی کو کورونا کے ایک ہزار سے زیادہ نئے کیسز سامنے آئے ہیں جبکہ کورونا کے ایکٹیو کیسز کی تعداد 11 ہزار سے بڑھ گئی ہے۔ 

جمعے کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے ایک ہزار187 نئے مریض سامنے آئے جبکہ ایک ہزار 176 افراد صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 14 مریض چل بسے، جس کے بعد مرنے والوں کی مجموعی تعداد بڑھ کر آٹھ ہزار 226 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز کی تعداد 11 ہزار 380 ہو گئی ہے، جن میں سے ایک ہزار 409 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 256 ہے جبکہ مکہ ریجن میں 212 افراد میں وائرس کی تصدیق ہوئی۔‘

الشرقیہ ریجن میں 174، عسیر ریجن میں 59، جازان ریجن میں 118، القصیم ریجن میں 92، مدینہ ریجن میں 64، نجران ریجن میں 52، الحدود الشمالیہ میں 31 ،حائل ریجن میں 58، تبوک ریجن میں 28، الباحہ ریجن میں 36 اور الجوف ریجن میں سات مریض سامنے آ ئے ہیں۔

اب تک پانچ لاکھ 24 ہزار 584 افراد میں کورونا وائرس کی تصدیق ہو چکی ہے جن میں سے پانچ لاکھ پانچ ہزار تین افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘