19 سے 29 جولائی تک سیاحوں کے کشمیر میں داخلے پر پابندی

پاکستان کی زیرانتظام کشمیر کے سیاحتی مقام وادی نیلم میں 19 جولائی سے 29 جولائی تک سیاحوں کے داخلے پر پابندی عائد کر دی گئی ہے۔

پیر کے روز ڈپنی کمشنر ضلع نیلم کی جانب سے جاری ہونے والے ایک حکم نامے میں درج ہے کہ ’ کورونا وائرس کے بڑھتے ہوئے کیسز، این سی او سی اورحکومت آزاد کشمیر کے فیصلوں کی روشنی میں مورخہ 19 جولائی سے 29 جولائی تک سیاح حضرات  کے آزادکشمیر خصوصاً ضلع نیلم داخلے پر پابندی ہو گی۔‘

ڈپٹی کمشنر کے دفتر سے جاری ہونے والے حکم نامے میں ایس پی پولیس، اسسٹنٹ کمشنرز، صدر گیسٹ ہاؤسز ایسوسئ ایشن اور صدر ٹرانسپورٹ یونین ضلع نیلم کو ہدایت کی گئی ہے کہ ’مالکان کو پابند کیاجائے کہ وہ 18 جولائی کے بعد کسی بھی گیسٹ ہاؤس  اور گاڑیوں کی بکنگ نہ کی جائے، پہلے سے ہوئی بکنگ کو منسوخ کیا جائے ۔‘