سعودی ایئر فورس کے طیارے سلطان ہیثم کے جہاز کو حصار میں لیے رہے

سلطنت عمان کے فرمانروا سلطان ھیثم بن طارق کی سعودی عرب آمد پر نیوم ایئرپورٹ پر سعودی ایئر فورس نے عمان کے پرچم کے رنگ فضا میں بکھیر دیے۔

سعودی خبر رساں ایجنسی ایس پی اے نے تصاویر جاری کی ہیں جس میں دیکھا جا سکتا ہے کہ سلطان ھیثم کے طیاروں کو مملکت کی فضائی حدود میں داخل ہوتے ہی سعودی طیاروں نے اپنے حصار میں لے لیا تھا۔ 

ایئرپورٹ پر اترتے وقت سعودی فضائیہ کے طیارے عمانی فرمانروا کے طیارے کو اپنے حصار میں لیے رہے۔

دوسری جانب سعودی دارالحکومت ریاض کی شاہراہوں، چوراہوں اور فلک بوس عمارتوں کو سلطان عمان کے دورہ مملکت کے موقع پر عمانی پرچموں سے سجادیا گیا۔

جگہ جگہ بینر لگائے گئے ہیں جن پر خیر مقدمی کلمات تحریر ہیں۔ 

یاد رہے کہ شاہ سلمان بن عبدالعزیز نے اتوار کو سلطان عمان کا پرجوش خیر مقدم کیا جبکہ سعودی عمانی رابطہ کونسل کے قیام سے متعلق مفاہمتی یادداشت پر دستخط کی تقریب میں دونوں رہنما موجود تھے۔