چوبیس گھنٹے میں کورونا کے ایک ہزار 207 نئے مریض

سعودی عرب میں بدھ 7 جولائی کو کورونا کے ایک ہزار سے زیادہ -نئے کیسز سامنے آئے ہیں جبکہ ایکٹیو کیسز گیارہ ہزار رہ گئے۔ 

بدھ کو سبق نیوز نے وزارت صحت کی جانب سے جاری بیان  کے حوالے سے بتایا کہ ’گذشتہ 24 گھنٹوں کے دوران کورونا کے ایک ہزار207 نئے مریض سامنے آئے جبکہ  ایک ہزار 195 افراد صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 14 مریض چل بسے، جس کے بعد مرنے والوں کی مجموعی تعداد بڑھ کر سات ہزار 907 ہو گئی ہے۔‘

وزارت کا کہنا ہے کہ ’مملکت میں کورونا کے ایکٹیو کیسز کی تعداد 11 ہزار 952 ہو گئی ہے، جن میں سے ایک ہزار 379 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 307 ہے جبکہ الشرقیہ ریجن میں 264 افراد میں وائرس کی تصدیق ہوئی۔‘

مکہ ریجن میں 222، عسیر ریجن میں 184، جازان ریجن میں 67، نجران ریجن میں 46، تبوک ریجن میں 28، حائل ریجن میں 23، مدینہ ریجن میں 23، الباحہ ریجن میں 19، الحدود الشمالیہ  میں 12، القصیم ریجن میں 6 اور الجوف ریجن میں 6 مریض سامنے آئے ہیں۔

اب تک چار لاکھ 96 ہزار 516 افراد میں کورونا وائرس کی تصدیق ہو چکی ہے جن میں سے چار لاکھ 76 ہزار 643 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘