پاکستان کی فضائیہ کے سربراہ کا نائیجیرین آرمی چیف کے انتقال پر اظہار افسوس
سربراہ پاک فضائیہ نے نائیجیریا کی فوج کے لیے لیفٹیننٹ جنرل ابراہیم اتاہرو کی خدمات کو سراہا۔ (فوٹو: اے ایف پی)
پاکستان کی فضائیہ کے سربراہ ایئرچیف مارشل ظہیر احمد بابر سدھو نے نائیجیریا کے آرمی چیف لیفٹیننٹ جنرل ابراہیم اتاہرو کی طیارے کے حادثے میں ہلاکت پر دلی رنج و غم کا اظہار کیا ہے۔
سنیچر کو جاری ایک بیان کے مطابق سربراہ پاکستانی فضائیہ نے مرحوم کی روح کے ایصال ثواب اور غمزدہ خاندان کے لیے صبر کی دعا کی۔
ظہیر احمد بابر سدھو نے کہا کہ لیفٹیننٹ جنرل ابراہیم اتاہرو ایک بہترین آرمی جرنیل تھے اور ان کی وفات کے بعد پیدا ہونے والے خلا کو پُر نہیں کیا جاسکتا۔
بیان کے مطابق سربراہ پاک فضائیہ نے نائیجیریا کی فوج کے لیے لیفٹیننٹ جنرل ابراہیم اتاہرو کی خدمات کو سراہا۔
