لبنان میں زینہ عکر کو وزیرخارجہ کا قلمدان بھی تفویض

لبنان کے صدر میشال عون نے وزیر خارجہ شربل وھبۃ کے مستعفی ہونے کے بعد زینہ عکر کو نیا وزیرخارجہ مقرر کیا ہے۔ زینہ عکر نائب وزیراعظم اور وزیر دفاع کے طور پر پہلے ہی سے کام کررہی ہیں۔  

لبنانی نیشنل  میڈیا ایجنسی کےمطابق صدر عون نے شربل وھبۃ کا استعفی منظور کرکے انہیں وزیرخارجہ کی حیثیت سے سبکدوش کردیا ہے۔  

میڈیا ایجنسی کا کہنا ہے کہ صدر میشال عون نے وزیراعظم حسان دیاب سے مشاورت کے بعد زینہ عکر کو وزیر خارجہ کے فرائض تفویض کیے ہیں۔ 

یاد رہے کہ لبنان میں نئی حکومت کی تشکیل میں کابینہ میں چھ خواتین کو شامل کیا گیا تھا۔ اس میں عرب دنیا کی تاریخ میں پہلی مرتبہ ایک خاتون زینہ عکر عدرا کو وزیر دفاع بنایا گیا۔

نئی حکومت میں زینہ عکر کو نائب وزیراعظم کا عہدہ بھی دیا گیا اور اب انہیں وزیر خارجہ کا محکمہ بھی تفویض کیا گیا ہے۔

 زینہ عکر لبنان کے معروف سرمایہ کار  لجواد عدرا کی اہلیہ ہیں۔ انہیں لبنان کے صدر میشال عون اور ان کے عزیز جبران باسیل کے قریبی حلقے کی اہم شخصیت سمجھا جاتا ہے۔