مکہ ریجن سمیت منگل کو کئی علاقوں میں بارش

سعودی موسمیات کے قومی مرکز نے کہا ہے کہ  منگل 4 مئی 2021 کو نجران، جازان، عسیر اور باحہ میں گرج چمک کے ساتھ بارش، تیز ہوائیں چلنے اور ژالہ باری کا امکان ہے۔

مکہ مکرمہ ریجن کے کئی علاقے بارش کی زد میں ہوں گے جبکہ الشرقیہ ریجن کے جنوبی علاقوں میں تیز ہوائیں چلیں گی اور گرج چمک کے ساتھ بارش کا امکان ہے۔ 

عاجل ویب سائٹ کے مطابق بحیرہ احمر میں ہواؤں کا رخ شمال مغرب سے مغرب کی جانب ہوگا۔ ہواؤں کی فی گھنٹہ رفتار 16 تا 36 کلو میٹر تک ہوگی۔ سمندر میں ڈیڑھ میٹر تک اونچی لہریں اٹھیں گی۔

خلیج عرب میں ہواؤں کا رخ جنوب مشرق سے شمال مشرق کی جانب ہوگا۔ فی گھنٹہ رفتار  16 تا  36 کلو میٹر ہوگی۔ لہریں ڈیڑھ میٹر تک اونچی ہوں گی۔

اخبار 24 کے مطابق قومی مرکز کا کہنا ہے کہ منگل کو سب سے زیادہ درجہ حرارت 40 سینٹی گریڈ مکہ مکرمہ اور سب سے کم درجہ حرارت  15 سینٹی گریڈ  باحہ میں ہوگا۔