خانہ کعبہ میں بارش اور ژالہ باری کے دوران طواف

سعودی عرب کے مقدس شہر مکہ میں منگل 27 اپریل کو بارش اور ژالہ باری ہوئی ہے اور مسجد الحرام میں عمرہ زائرین نے بارش کے دوران طواف کیا اور عصر کی نماز ادا کی۔

مکہ کے مختلف علاقوں میں کہیں تیز اور کہیں کم بارش کی اطلاعات ہیں، بارش کے باعث کئی مقامات زیر آب بھی آئے۔

 امارات مکہ ریجن نے اپنے ٹوئٹر اکاونٹ پر بارش اور ژالہ باری کی وڈیو شیئر کی ہے۔

مسجد احرام کی انتظامیہ نے بارش کے دوران عمرہ زائرین کے لیے انتظامات پہلے ہی کر رکھے تھے۔ طواف کرنے والوں کو گروپوں کی شکل میں زمینی منزل کے مطاف بھیجا گیا۔

بارش کے دوران عام گروپ بندی معطل کردی گئی اور شاہ فہد کی توسیع  والی عمارت میں عمرہ زائرین کو بھیج دیا گیا۔ یہاں دو ہزار عمرہ زائرین کی گنجائش ہے۔

  مقدس مساجد کی انتظامیہ نے عمرہ اور نماز کے لیے آنے والوں کو بارش سے بچانے کے لیے گرین چھتریاں فراہم کی ہیں۔ ان کا انتظام وزارت اسلامی امور کی جانب سے کیا گیا تھا۔