کورونا کے نئے مریض 700 سے زیادہ، ایکٹیو کیسز بھی بڑھ گئے

سعودی عرب میں  بدھ  کو  دوسرے دن بھی کورونا کے نئے کیسز 700 سے زیادہ سامنے آئے ہیں اور ایکٹیو کیسز سات ہزار سے بڑھ گئے ہیں۔

یاد رہے کہ مملکت میں کورونا کے یومیہ نئے کیسز سو سے بھی کم آ رہے تھے۔ سات ماہ بعد اب نئے کیسز دوبارہ بڑھ رہے ہیں۔

سبق نیوز نے وزارت صحت کی جانب سے جاری بیان کے حوالے سے بتایا ہے کہ ’ بدھ کو گذشتہ 24 گھنٹوں کے دوران کورونا کے 783 نئے مریض سامنے آئے جبکہ 417 افراد وائرس سے صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 8 مریض چل بسے، جس کے بعد مرنے والوں کی تعداد چھ  ہزار 719 ہو گئی ہے۔‘

وزارت کا کہنا ہے کہ ’مملکت میں کورونا کے ایکٹیو کیسز کی تعداد سات ہزار 44 ہو گئی ہے، جن میں سے 852 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 341 ہے جبکہ مکہ ریجن میں 142 افراد میں وائرس کی تصدیق ہوئی ہے۔‘

شرقیہ ریجن میں 131، عسیر ریجن میں 30، مدینہ ریجن میں 25،  القصیم ریجن میں 22، حائل ریجن میں 22، جازان ریجن میں 20، تبوک ریجن میں 18،جازان ریجن میں 17، نجران ریجن میں دس ،الجوف ریجن میں نو ، الحدود الشمالیہ میں نو، جبکہ الباحہ ریجن میں سات مریض سامنے آئے ہیں۔

اب تک تین لاکھ 94 ہزار 952 افراد میں کورونا وائرس کی تصدیق ہو چکی ہے جن میں سے تین لاکھ 81 ہزار 189 افراد شفایاب بھی ہوئے ہیں۔

   وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘