تم دو تھپڑ مارو گے، ہم دس تھپڑ ماریں گے: مریم نواز

مسلم لیگ ن کی نائب صدر مریم نواز نے پارلیمنٹ ہاؤس کے باہر ہونے والی ہنگامہ آرائی پر حکومت کو مخاطب کرتے ہوئے کہا ہے کہ ’اس حملے کی بہت بڑی قیمت چکانی ہوگی، تم دو تھپڑمارو گے، ہم دس تھپڑ ماریں گے۔‘

اتوار کو لاہور میں پارٹی اجلاس کے بعد پریس کانفرنس کرتے ہوئے مریم نواز کا کہنا تھا کہ ’سینیئر قیادت کی کرائے کےغنڈوں کے ہاتھوں تذلیل برداشت نہیں کی جائے گی۔ پارلیمنٹ لاجز کو بنکر بنایا ہواتھا ایسا لگا شمالی وزیرستان کا علاقہ ہے۔‘

ان کا کہنا تھا کہ اجلاس میں لانگ مارچ اور کراچی میں این اے 249 کے الیکشن سمیت بہت سے اہم معاملات پر گفتگو ہوئی۔

مریم نواز نے حکومت پر تنقید کرتے ہوئے کہا کہ ’اعتماد کا ووٹ لینے کے لیے اداروں کو استعمال کیا گیا۔‘

ان کے مطابق ’وزیراعظم کے اعتماد کا ووٹ لینے کی کوئی قانونی اور اخلاقی حیثیت نہیں ہے۔‘

ن لیگ کی نائب صدر نے مزید کہا کہ ’ان کے ایم این ایز ہمارے ساتھ رابطے میں ہیں۔ ان کو گولڑہ میں لے جایا گیا اور کنٹینر میں بند کیا گیا اور ووٹ دینے کے لیے کہا گیا۔‘

ان کا کہنا تھا کہ ’گردنوں پر تلوار رکھ کر اعتماد کا ووٹ لیا گیا، اپنے ہی اراکین سے زبردستی ووٹ لینے کا مطلب ہے عمران خان تمہارا وقت گزر چکا ہے۔‘

مریم نواز نے کہا کہ ان جماعت نے کراچی کے حلقہ 249 سے مفتاح اسماعیل کو ٹکٹ دینے کا فیصلہ کیا ہے۔