خاتون کو تنگ کرنے والے ڈرائیور کے خلاف کارروائی

سعودی محکمہ ٹریفک نے ایک سعودی خاتون ڈرائیور کی طرف سے شیئر کی جانے والی ویڈیو پر کارروائی کرتے ہوئے ایک ڈرائیور کے خلاف کارروائی کی ہے۔

سبق ویب سائٹ کے مطابق جدہ کے روئل ٹرمنل اور جوہرہ سٹیڈیم کے درمیان سفر کرنے والی ایک خاتون نے ویڈیو شیئر کی ہے جس میں دیکھا جاسکتا ہے کہ سامنے والی گاڑی انہیں راستہ نہیں دے رہی۔

خاتون نے ویڈیو میں کہا ہے کہ ’سامنے والی گاڑی کا ڈرائیور مسلسل تنگ کر رہا ہے اور راستہ نہیں دے رہا‘۔

ٹوئٹر پر ویڈیو شیئر ہوتے ہی محکمہ ٹریفک نے فوری کارروائی کی اور خلاف ورزی کرنے والے ڈرائیور کی شناخت کرلی۔

محکمہ ٹریفک نے مذکورہ شخص کے خلاف ٹریفک قوانین کے مطابق کارروائی کی ہے۔

خاتون نے فوری کارروائی پر محکمہ ٹریفک کا شکریہ ادا کیا ہے۔