آوارہ کتے کا شیرنی کو چیلنج، ’یہ تاریخ کی بہت انوکھی لڑائی ہے‘

انڈین جنگلات میں اپنی خدمات سر انجام دینےوالی پروین کاسوان نے سماجی رابطے کی ویب سائٹ ٹوئٹر پر ایک شیرنی اور کتے کی غیر معمولی لڑائی کی ایک ویڈیو کلپ شئیر کی ہے۔

ڈیڑھ منٹ دورانیے کی اس ویڈیو میں شیرنی آوارہ کتے کا تعاقب کرتے ہوئے دیکھی جا سکتی ہے۔ یہ منظر کچھ فاصلے پر جیب کے پاس کھڑے سیاحوں نے بھی دیکھا۔

ویڈیو میں دیکھا جا سکتا ہے کہ کتا بھاگتے ہوئے غصے میں شیرنی پر بھڑک بھی رہا ہے اور خود کو شیرنی سے بچا بھی رہا ہے۔

لڑائی چھڑ جانے کے بعد جیسے ہی شیرنی نے کتے کی قریب جانے کی کوشش کی تو کتے نے بڑی ہمت دیکھائی اور بھونکھنا شروع کردیا جس نے شیرنی کو پیچھے ہٹنے پر مجبور کردیا۔ شیرنی نے پیچھے ہٹ کر راستہ بدل لیا جسے قریب موجود سیاحوں اور لوگوں نے کیمرے کی آنکھ میں محفوظ کرلیا۔

یہ کلپ شیئر کرتے ہوئے انہوں نے لکھا کہ ’زندگی میں اتنی ہمت اور اعتماد کی ضرورت ہے، ’کتا بمقابلہ شیر‘ مزید بات کرتے ہوئے انہوں نے لکھا کہ یہ ویڈیو آوارہ کتوں اور وائلڈ لائف جانوروں کی آپسی تعلق سے پیدا ہونے والے مسائل کو اجاگر کرتی ہے۔

اس ویڈیو کو ٹوئٹر پر 16 لاکھ لوگ دیکھ چکے ہیں اور صارفین کی جانب سے ردعمل بھی سامنے آرہا ہے۔ جہاں کچھ لوگوں نے لڑائی کے حیرت انگیز نتائج پر تبصرہ کیا وہیں بیشتر صارفین ایسے بھی تھے جنھوں نے آوارہ کتوں کے مسائل کے حوالے سے بھی بات چیت کی۔

ٹوئٹر صارف گورو کانسگارا نے لکھا کہ ’یہ تاریخ کی بہت انوکھی لڑائی ہے جس میں کتا اور شیر آمنے سامنے ہیں۔ لیکن ایسا بھی ہوسکتا ہے کہ ارد گرد کچھ لوگوں ہونے کی وجہ سے کتا اس قدر ہمت دیکھا رہا ہو؟

ٹوئٹر صارف لکشندرا سنگھ نے کہا کہ ’یہ سچ ہے کہ کتے جب انسانوں کے ساتھ ہوں تو وہ بہادر بن جاتے ہیں۔‘

یاد رہے اس سے قبل افریقی بجو کی شیروں سے لڑنے کی ایک ویڈیو سوشل میڈیا پر وائرل ہوئی تھی۔ اپنے سے کئی زیادہ طاقت ور اور شیروں کے جھنڈ سے لڑنے کے باوجود بھی افریقی بجو نے وہ لڑائی جیت کر بڑے بڑے شیروں کو پیچھے ہٹنے پر مجبور کردیا تھا۔