ریاض میں فرنیچر اور استعمال شدہ کپڑوں کے گوداموں پر چھاپہ

ریاض میونسپلٹی نے فرنیچر اور استعمال شدہ کپڑوں کے غیر قانونی گودام پر چھاپہ مار کر متعدد غیر ملکیوں کو گرفتار کیا ہے۔

سبق ویب سائٹ کے مطابق میونسپلٹی نے اپنے ٹوئٹر اکاؤنٹ میں کہا ہے کہ ’ریاض کے پرانے علاقے میں واقع متعدد مکانوں کو غیر ملکیوں نے گودام میں تبدیل کر رکھا تھا۔‘

میونسپلٹی کا مزید کہنا ہے کہ ’اطلاع ملتے ہی کارروائی کی گئی تو معلوم ہوا کہ غیر ملکیوں نے یہاں فرنیچر اور استعمال شدہ کپڑوں کے کئی گودام قائم رکھے ہیں‘۔

میونسپلٹی کے مطابق یہ لوگ غیر قانونی طور پر یہ اشیا فروخت کرتے تھے، انہیں گرفتار کیا گیا ہے جبکہ گوداموں میں موجود تمام سامان ضبط کرلیا گیا ہے۔

’گودام کو صاف کرکے سیل کردیا گیا ہے جبکہ مکان مالک کو وضاحت کے لیے طلب کیا گیا ہے۔‘

میونسپلٹی کے مطابق جن غیر ملکیوں کو گرفتار کیا گیا ہے ان کے کفیلوں کو بلایا جائے گا تاکہ تحقیق کی جاسکے کہ آیا یہ آزاد لیبر ہے یا اپنے کفیلوں کے پاس کام کرتے ہیں۔

میونسپلٹی نے شہریوں اور مقیم غیرملکیوں کو ہدایت کرتے ہوئے کہا ہے کہ قانون نافذ کرنے والے اداروں کو رہائشیوں کے تعاون کے  ضرورت ہے۔

میونسپلٹی  کا کہنا ہے کہ ’جہاں کہیں بھی غیر قانونی، غیر معیاری اور ضابطوں کے خلاف چیز دیکھیں تو فوری طور پر مطلع کریں۔‘