متاثرین کی تعداد بڑھ کر 3 لاکھ 29 ہزار 271 ہو گئی ہے۔(فوٹو ایس پی اے)
سعودی عرب میں کورونا وائرس کے نئے کیسز میں مسلسل ریکارڈ کمی ہورہی ہے۔
سنیچر کو مسلسل تیسرے دن 600 سے کم نئے مریض سامنے آئے۔ 90 فیصد سے زیادہ مریض صحت یاب ہوچکے ہیں۔
وزارت صحت کے مطابق سنیچر 19 ستمبر کو گذشتہ 24 گھنٹوں کے دوران 551 نئے مریض سامنے آئے۔ اس طرح متاثرین کی تعداد بڑھ کر 3 لاکھ 29 ہزار 271 ہو گئی ہے۔
سبق نیوز نے وزارت صحت کی جانب سے جاری اعداد و شمار کے حوالے سے بتایا کہ گذشتہ 24 گھنٹوں کے دوران ایک ہزار 78 افراد صحت یاب ہوئے ہیں۔ اب تک 3 لاکھ 9 ہزار 430 افراد اس مرض سے شفایاب ہو چکے ہیں۔
اس وقت ایکٹیو کیسز کی تعداد 15 ہزار 383 ہے(فائل فوٹو روئٹرز)
وزارت صحت کا کہنا ہے کہ گذشتہ روز کورونا سے28 افراد ہلاک ہوئے۔ اموات کی مجموعی تعداد چار ہزار 458 ہو چکی ہے۔
مملکت میں اس وقت ایکٹیو کیسز کی تعداد 15 ہزار 383 ہے جن میں سے ایک ہزار 189 مریض انتہائی نگہداشت یونٹ میں زیرعلاج ہیں۔
گذشتہ 24 گھنٹوں کے دوران مختلف شہروں میں کورونا وائرس کے نئے کیسز کی سب سے زیادہ تعداد جدہ میں رہی جہاں 51 نئے مریض سامنے آئے ہیں۔
مکہ میں 50، مدینہ 42، الھفوف 37، ینبع 31، ریاض 29، المبرز 24، بلجرشی 24، الظہران 16، حائل 16، جازان 15،دمام 13 اور القطیف میں 13 کیسز کا پتا چلا ہے۔
کیسز میں کمی کے حوالے سے تمام اشارے امید افزا ہیں۔(فائل فوٹو روئٹرز)
اعداد و شمار کے مطابق 12 شہروں میں مریضوں کی تعداد ایک، ایک، 18 شہروں میں 2، 2 اور 8 شہروں میں 3،3 جبکہ 8 شہروں میں 4،4 افراد میں کورونا وائرس کی تصدیق ہوئی ہے۔
سعودی عرب میں متعدی امراض سے بچاؤ اور وبا کو پھیلنے سے روکنے کے لیے حفاظتی اقدامات کا سلسلہ جاری ہے۔
وزارت صحت کے ترجمان نے کہا ہے کہ پچھلے ایک ماہ سے کورونا کے کیسز میں مسلسل کمی آرہی ہے۔
ترجمان کا کہنا تھا کہ کورونا کے کیسز میں کمی کے حوالے سے اب تک تمام اشارے امید افزا ہیں۔
