خود کشی کی کوشش کرنے والے عمرہ زائر کو بچالیا گیا

مکہ میں خود کشی کی کوشش کرنے والے ایک عمرہ زائر کو بچا لیا گیا ہے۔ اس نے گلے میں رسی ڈال کر خود کشی کی کوشش کی تاہم اس کی چیخیں سن کر لوگ مدد کو پہنچ گئے۔

سبق ویب سائٹ کے مطابق عینی شاہدین کا کہنا ہے کہ ’ہوٹل کی پانچویں منزل سے عمرہ زائر کی چیخیں سنائی دے رہی تھیں، مدد کو پہنچنے والے لوگوں نے اسے زمین پر گرا ہوا پایا جبکہ اس کے گلے میں پھندا تھا‘۔

مکہ پولیس ذرائع کا کہنا ہے کہ ’عمرہ زائر کو ہلال احمر کے ذریعہ الزاہر محلے میں واقع کنگ عبد العزیز ہسپتال منتقل کردیا گیا ہے‘۔

ذرائع نے کہا ہے کہ ’خود کشی کی کوشش کرنے والے عمرہ زائر کے بھائی کہنا ہے کہ اس پر جادو کا اثر ہے۔ وہ نفسیاتی طور پر مریض ہے‘۔

ذرائع کا کہنا ہے کہ ’پولیس نے واقعے کی تفتیش شروع کر دی ہے جبکہ یہ معلوم نہیں ہوسکا کہ خود کشی کرنے کی کوشش کرنے والا کس ملک سے تعلق رکھتا ہے‘۔