جیلوں میں خواتین ملٹری پولیس اہلکاروں کے لیے تربیتی کورس
جیلوں میں خواتین ملٹری پولیس اہلکاروں کے لیے تربیتی کورس
پیر 3 فروری 2020 11:08
خواتین اہلکاروں کو تفتیش اور تلاشی کے علاوہ امن وامان برقرار رکھنے کے گر سکھائے جائیں گے ( فوٹو: سبق)
جدہ اور طائف کی جیلوں میں ملٹری پولیس کی خواتین اہلکاروں کو تلاشی لینے کا ہنر سکھایا جا رہا ہے۔
سعودی بری فوج کی خواتین ملٹری پولیس اہلکاروں کے لیے تربیتی کورس کا انعقاد 5 دن تک جاری رہے گا۔
سبق ویب سائٹ کے مطابق مکہ مکرمہ ریجن کے محکمہ جیل خانہ جات کے قائم مقام سربراہ بریگیڈیئر ڈاکٹر ابراہیم بن سعد الغامدی نے کہا ہے کہ ’پہلی مرتبہ اس نوعیت کا تربیتی کورس منعقد کیا جارہا ہے‘۔
’ پہلی مرتبہ اس نوعیت کا تربیتی کورس منعقد کیا جارہا ہے‘ ( فوٹو: سبق)
انہوں نے بتایا ہے کہ ’کورس میں خواتین ملٹری پولیس اہلکاروں کو تفتیش اور تلاشی کے گر سکھائے جائیں گے۔ جیل میں سامان کی تلاشی، امن وامان برقرار رکھنے، قیدیوں اور وزٹر کی سلامتی اور ریکارڈ رکھنے کی بھی تربیت دی جا رہی ہے‘۔
انہوں نے بتایا ہے کہ ’خواتین اہلکاروں کے لیے تربیتی کورس مسلح افواج اور محکمہ جیل خانہ جات کے درمیان تعاون کے سلسلے کی ایک کڑی ہے‘۔
