پنجاب حکومت رواں برس بھی کاشتکاروں کو گندم کا بیج مفت فراہم کریگی، محکمہ زراعت راولپنڈی

محکمہ زراعت راولپنڈی کے ترجمان نے کہا ہے کہ وزیر اعلیٰ پنجاب شہباز شریف کی ہدایت پر گزشتہ سال کی طرح اس سال بھی ہر گاﺅں میں گندم کا ترقی دادہ اور کُنگی سے محفوظ بیج مفت فراہم کیا جائے گا۔ اس سکیم کا مقصدگندم کی فی ایکڑ پیداوار میں اضافہ کرنا ہے۔ اس پروگرام کے تحت آبپاش علاقوں میں 2 ایکڑ گندم کی کاشت کےلئے 100 کلوگرام اور بارانی علاقوں میں 1 ایکڑ پر کاشت کےلئے 50 کلوگرام گندم کا ترقی دادہ، کنگی سے محفوظ بیج ہر گاﺅں سے قرعہ اندازی میں پہلے نمبر پر آنے والے ترقی پسند کاشتکاروں کو مفت فراہم کیا جائے گا۔ ہر گاﺅں میں بیج کی کل مقدار کا تعین اس گاﺅں میں گزشتہ سال کی گندم کی کاشت کے رقبہ کی بنیاد پر کیا جائے گا۔ بیج کے حصول کے لئے آبپاش علاقوں کے 2 تا 25 ایکڑ اور بارانی علاقوں کے 1 تا 25 ایکڑ کے قابل کاشت اراضی کے مالک، ٹھیکیدار اور مزارعین مرد و خواتین کاشتکار درخواست دینے کے اہل ہوں گے۔ گزشتہ سال اس سکیم کے تحت مفت بیج حاصل کرنے والے کاشتکار اس سال دوبارہ درخواست دینے کے اہل نہیں ہوں گے۔ ہر درخواست دہندہ کا ریکارڈ گاﺅں کی بنیاد پر متعلقہ دفتر زراعت آفیسر (توسیع) میں درج ہو گا۔ گاﺅں، تحصیل، ضلع اور صوبائی سطح کی کمیٹیاں اس پروگرام کی نگرانی کریں گی۔ محکمہ زراعت اور محکمہ مال کے ملازمین اور ان کے گھرانہ کے افراد اس سکیم میں حصہ لینے کے اہل نہیں ہوں گے۔ کاشتکار درخواست فارم متعلقہ ڈسٹرکٹ آفیسر زراعت (توسیع)، ڈپٹی ڈسٹرکٹ آفیسر زراعت (توسیع) یا زراعت آفیسر (توسیع) کے دفاتر سے مفت حاصل کر سکتے ہیں۔