اسلام آباد...وزیر خارجہ شاہ محمود قریشی نے کہاہے کہ ہندوستان سیاسی مقاصد اور انتخابات کے لئے جنوبی ایشیا کے امن شدید خطرات سے دوچار کر رہا ہے۔پاکستان خطے میں امن و استحکام کا خواہاں ہے تاہم اپنی سالمیت پر سمجھوتہ نہیں کر سکتے۔ منگل کو وزیر خارجہ نے امریکی وزیر خارجہ مائیک پومپیو سے ٹیلیفونک رابطہ کیا خطے میں امن و امان کی صورتحال پر تبادلہ خیال کیا گیا۔ لائن آف کنٹرول کی خلاف ورزی اور حکومت پاکستان، پارلیمنٹ اور عوامی جذبات سے آگاہ کیا۔وزیر خارجہ نے کہاکہ ہندوستان سیاسی مقاصد اور انتخابات کے لئے جنوبی ایشیا کے امن کو شدید خطرات سے دوچار کر رہا ہے ۔ پاکستان خطے میں امن و استحکام کا خواہاں ہے لیکن اپنی سالمیت پر سمجھوتہ نہیں کر سکتے۔انہوںنے کہاکہ ہندوستان کے عزائم سے پہلے ہی بین الاقوامی برادری کو آگاہ کر چکے تھے ۔ پاکستان نے پلوامہ واقعہ کے بعد ہند کی طرف سے دھمکیوں کے باوجود، انتہائی ذمہ دارانہ رویہ اختیار کیا ہے ۔مخدوم شاہ محمود قریشی نے کہاکہ ہندوستان کی اس جارحیت سے افغانستان میں قیام امن کے حوالے سے کی جانے والی مشترکہ کاوشیں متاثر ہو سکتی ہیں ۔انہوںنے کہا کہ ہند کا جارحانہ اقدام انتہائی قابل مذمت ہے ۔امید ہے کہ امریکہ اس سلسلے میں اپنا کردار ادا کرےگا۔ دریں اثناءپاکستان میں چین کے سفیر یاﺅ جنگ نے وزارتِ خارجہ میں وزیر خارجہ مخدوم شاہ محمود قریشی سے ملاقات کی۔ خطے میں امن و امان کی صورتحال پر تبادلہ خیال کیا گیا ۔وزیر خارجہ نے چینی سفیر کو پلوامہ واقعہ کے بعد ہندکے بے جا الزامات اور لائن آف کنٹرول کی صریحاً خلاف ورزی پر پاکستان کے موقف سے آگاہ کیا۔انہوں نے کہا کہ پاک چین دوستی لازوال اور خطے میں پائیدار امن کی حامل ہے ۔
