مریم اورنگزیب رکشے پر جیل پہنچیں

لاہور...مسلم لیگ (ن) کی مرکزی ترجمان مریم اورنگزیب رکشے پر سوار ہو کر کوٹ لکھپت جیل تک پہنچیں۔ گزشتہ روز مریم اورنگزیب سابق وزیر اعظم اور پارٹی قائد محمد نواز شریف سے ملاقات کیلئے کوٹ لکھپت جیل آئیں تو رکاوٹوں کے باعث آگے نہیں جانے دیا گیا ۔سابق وزیر اطلاعات گاڑی سے نیچے اتر کر تھوڑا پیدل چلنے کے بعد رکشے میں سوار ہو کر جیل داخلے کیلئے مختص پوائنٹ تک پہنچیں۔ مرکزی راستے پر تعینات جیل اہلکاروں کی جانب سے بزرگ سیاستدان جاوید ہاشمی کو موٹر سائیکل پر سوار کرا کے کوٹ لکھپت جیل تک پہنچایا گیا۔سابق وزیر اعظم شاہد خاقان عباسی اور ن لیگ کے دیگر رہنما پیدل جیل کے دروازے تک گئے۔