اسلام آباد: قطر کی جانب سے پاکستانی چاول کی درآمد پر عائد طویل پابندی اٹھا لی گئی ہے۔ ذرائع کے مطابق وزیراعظم عمران خان کے حالیہ دورۂ قطر کے دوران قطری حکومت نے 2010ء سے پاکستانی چاول کی درآمد پر عائد پابندی ختم کردی۔ اس حوالے سے وزرات تجارت کے اعلامیے میں کہا گیا ہے کہ پاکستانی چاول کی درآمد پر 12-2011ء میں پاکستانی ایکسپورٹرز کی طرف سے قطر کو غیر معیاری چاول کی سپلائی کے باعث پابندی عائد کی گئی تھی۔
حالیہ فیصلے سے سالانہ 40 سے 50 ملین ڈالرز کی درآمدات میں اضافہ ہوگا۔2010-11ء تک پاکستان قطر کو 80 سے 90 ملین ڈالرز کے 80 ہزار سے ایک لاکھ ٹن سالانہ چاول برآمد کرتا رہا جب کہ گزشتہ 5 برس میں قطر کو چاول کی برآمدات گرکر 20 سے 25 ملین ڈالرز کی سطح پر آگئی۔ پاکستان قطر کو چاول برآمد کرنے والوں کے چاولوں کے معیار کی انسپیکشن کے لیے ایک تھرڈ پارٹی آڈٹ کروائے گا۔
