کراچی کےلئے بڑا پیکیج آرہا ہے،اسپیکراسد قیصر

کراچی ...اسپیکر قومی اسمبلی اسد قیصرنے کہاہے کہ اٹھارویں ترمیم کے خلاف نہیں۔ پہلی مرتبہ کراچی کے لئے بڑا پیکیج جلد آرہا ہے۔کراچی کے لئے ٹرانسپورٹ کا پروجیکٹ شروع کرنے والے ہیں۔پی ٹی آئی کراچی کے عوام کو بے شمار تحفے دے گی۔حزب اختلاف کی جماعتیں چاہتی ہیں کہ موجودہ حکومت اپنی آئینی مدت پوری کرے۔پارلیمنٹ کی مضبوطی میں ہی عوامی مسائل کا حل مضمر ہے۔کراچی میں پانی کے مسئلے کو حل کرینگے۔ تحریک انصاف کے رکن قومی اسمبلی فہیم خان کی رہائش پرکراچی سے تعلق رکھنے والے ارکان قومی و صوبائی اسمبلی سے ملاقات کے بعد صحافیوں سے گفتگو کرتے ہوئے اسد قیصر نے کہاکہ موجودہ اسمبلی قانون سازی کی اپنی بنیادی ذمہ داری ادا کرے گی اور ریکارڈ تعداد میں قوانین بنائے گی۔ حزب اختلاف کی جماعتوں نے اس حوالے سے تعاون کی یقین دہانی کرائی ہے۔ کراچی نے پی ٹی آئی پر جو اعتماد کیا ہے وہ عوامی اعتماد پر پورا اترے گی۔ پانی اور سیوریج کے مسائل حل کرنا پہلی ترجیح ہے۔کراچی کو روشنی کا شہر امن کا گہوارہ بنائینگے۔