ملکی خوشحالی بلوچستان کے امن واستحکام سے جڑی ہے،جنرل باجوہ

راولپنڈی...پاک فوج کے سربراہ جنرل قمر جاوید باجوہ نے کہا ہے کہ پاکستان کی خوشحالی بلوچستان کے امن واستحکام اور خوشحالی سے جڑی ہے۔آئی ایس پی آر کے مطابق آرمی چیف جنرل قمر جاوید باجوہ سے وزیر اعلیٰ بلوچستان جام کمال خان نے ملاقات کی۔ صوبے کی سیکیورٹی صورتحال پر بات چیت کی گئی ۔ وزیراعلیٰ بلوچستان نے صوبے میں سیکیورٹی ماحول میں بہتری لانے اور خوشحال بلوچستان پروگرام کے تحت سماجی و معاشی ترقی کے منصوبوں میں پاک فوج کی کوششوں کو سراہا۔اس موقع پر آرمی چیف نے کہاکہ بلوچستان میں سیکیورٹی کی صورتحال برقرار رکھنا پاک فوج کی اولین ترجیح ہے۔ پاکستان کی ترقی کا امن سے گہرا تعلق ہے۔ پاکستان کی خوشحالی بلوچستان کے امن واستحکام اورخوشحالی سے جڑی ہے۔انہوں نے کہا کہ بلوچستان میں پاک افغان سرحد پر باڑ کی تنصیبات سے امن و امان میں مزید بہتری آئے گی ۔پاک ایران سرحد پر سیکیورٹی رابطے و تعاون سے بھی سیکیورٹی کی صورتحال میں بہتری آئے گی۔