کوئٹہ: مغوی ڈاکٹر کی عدم بازیابی پر احتجاج جاری‘ مریض پریشان

کوئٹہ: بلوچستان کے دارالحکومت کوئٹہ سے اغوا ہونے والے نیورو سرجن ڈاکٹر ابراہیم خلیل کو 8روز بعد بھی بازیاب نہ کرایا جا سکا جس کے خلاف سرکاری اسپتالوں میں ڈاکٹرز کی جانب سے او پی ڈیز کابائیکاٹ چوتھے روز بھی جاری ہے ۔مسلسل احتجاج کے باعث مریضوں کو شدید مشکلات کا سامنا ہے ۔ نیوروسرجن ابراہیم خلیل کو 13 دسمبر کو کوئٹہ کے علاقے شہباز ٹاو¿ن کے قریب سے اغوا کیا گیا تھا جس کے بعد کوئٹہ کے ڈاکٹرز کی تنظیموں نے احتجاج اور او پی ڈیز کے بائیکاٹ کی دھمکی دی تھی۔ ابراہیم خلیل کو بازیاب نہ کرائے جانے کے بعد ڈاکٹروں نے احتجاجاً اسپتالوں میں کام روک دیا تھا اور او پی ڈیز کا بائیکاٹ کیا تھا جس کا آج چوتھا دن ہے۔ پولیس کا کہنا ہے کہ سول اسپتال کے نیورو سرجن ڈاکٹر شیخ ابراہیم خلیل جمعرات کو نجی اسپتال سے واپس اپنے گھر جا رہے تھے کہ انہیں راستے سے اغوا کر لیا گیا۔ ابراہیم خلیل کی گاڑی گھر قریب سے مل گئی جس کے شیشے ٹوٹے ہوئے تھے جبکہ ان سے موبائل فون پر رابطہ بھی نہیں ہوسکا۔