بانی متحدہ اور اہلخانہ سے منسوب مقامات کے نام بدلنے کی رپورٹ طلب

کراچی: سندھ حکومت نے ایم کیو ایم کے بانی اور ان کے اہل خاندان کے ناموں سے منسوب عمارتوں، عوامی مقامات اور اداروں کے نام بدلنے کے معاملے پر متعلقہ حکام سے عملدرآمد رپورٹ طلب کرلی۔ ذرائع کے مطابق صوبائی حکومت کی جانب سے صوبائی محکمہ صحت، تعلیم، بلدیات، میونسپل کمشنر کے ایم سی، ڈی جی کے ڈی اے ، کمشنر کراچی اور شہر کے تمام 6 اضلاع کے ڈپٹی کمشنرز کو لکھے گئے خطوط میں ناموں کی تبدیلی کے فیصلوں پر عملدرآمد کی رپورٹ طلب کرتے ہوئے استفسار کیا گیا ہے کہ کتنے مقامات اور اداروں کے نام تبدیل کئے گئے ۔ اس حوالے سے لکھے گئے خط کے ساتھ 51 مقامات کی فہرست بھی ارسال کی گئی ہے جس کے مطابق بانی متحدہ اور ان سے متعلق افراد کے نام پر 13 پارک، 17 تعلیمی ادارے، 3 لائبریریاں، 4 اسپتال، 7 گلیاں، پل اور انڈر پاس فہرست کا حصہ ہیں۔ خط میں مزید کہا گیا کہ ان کے علاوہ بھی اگر کوئی مقام یا ادارہ بانی متحدہ یا ان کے اہلخانہ کے نام پر ہے تو اسے تبدیل کرکے رپورٹ دی جائے ۔ سندھ حکومت کی جانب سے متعلقہ حکام سے یہ رپورٹ 27 نومبر تک طلب کی گئی ہے ، جسے آئندہ ایپکس کمیٹی کے اجلاس میں پیش کیا جائےگا۔ واضح رہے کہ سندھ کابینہ اور صوبائی اپیکس کمیٹی کے اجلاسوں میں بانی متحدہ اور ان کے اہل خاندان کے نام سے منسوب عوامی مقامات کا نام تبدیل کرنے کا فیصلہ کیا گیا تھا۔