سی پیک کو ناکام بنانے کی ساز ش ہو رہی ہے،فواد چوہدری

لاہور... وفاقی وز یر ِ اطلاعات فواد چوہدری نے کہا ہے کہ سی پیک کو ناکام بنانے کی سازش کی جا رہی ہے۔ وزیر اعظم کھلے دل کے مالک ہیں ۔کسی کی تنقید کا برا نہیں مانتے۔ کسی نے سپریم کورٹ کا فیصلہ پڑھا ہی نہیں۔انتشار و بدامنی پھیلانے والے دلیل سے عاری ہیں۔ پبلک اکاونٹس کمیٹی کی سربراہی شہباز شریف کو کس طرح دی جاسکتی ہے۔کیا وہ اپنے بھائی نواز شریف کی کرپشن کی تحقیقات کریں گے۔کیا وہ جیل میں بیٹھ کر اجلاس کی صدارت کریں گے۔معزز اراکین کو اجلاس میں شرکت کے لئے جیل نہیں بھیج سکتے۔کوئی غلط فہمی میں نہ رہے کہ پارٹی میں کوئی بحران پیدا ہوا ہے۔لاہور میں پریس کانفرنس کرتے ہوئے فواد چوہدری نے وفاقی وزیر طارق بشیر چیمہ کی جہانگیر ترین کو گورنر پنجاب کی شکایت لگانے کی ویڈیو پر بات کرتے ہوئے کہا کہ چھوٹے موٹے اختلافات رہتے ہیں۔ اسے بڑا مسئلہ نہیں کہہ سکتے۔ اسپیکر یا وزیراعلی ہو، وہ پارٹی کے ورکرز ہیں۔انہوں نے کہا کہ ہماری پارٹی میں صرف ایک لیڈر ہے اور وہ عمران خان ہیں، وہ جو بات کریں گے وہی حتمی ہوگی۔ فواد چوہدری نے کہا کہ خود وزیراعظم بننا اور چھوٹے بھائی کو وزیراعلی بنا دینا، عمران خان کا ایجنڈا نہیں۔پی ٹی آئی اور اپوزیشن کی سیاست میں یہی بنیادی فرق ہے۔ انہوں نے کہا کہ ڈی جی نیب نے جیسے ہی شہباز شریف کو گرفتار کیا تو کہا گیا کہ ان کی ڈگری جعلی ہے۔اگر ان کی ڈگری جعلی تھی تو سابق حکومت نے کیوں کارروائی نہیں کی۔فواد چوہدری نے کہا کہ اصولی طور پر پبلک اکاونٹس کمیٹی کی سربراہی ہمارے پاس ہونی چاہیے۔زرداری اور شریف خاندانوں سے پیسے نکلوانے سے قرضوں کا مسئلہ حل ہوسکتا ہے۔خورشید شاہ کس کے ساتھ ہیں یہ تو پیپلز پارٹی والوں کو بھی نہیں پتہ۔وفاقی وزیر اطلاعات نے جے یو آئی(ف)کے سربراہ مولانا فضل الرحمان پر تنقید کرتے ہوئے کہا کہ وہ ایک عرصے تک کشمیر کمیٹی کے چیئرمین رہے۔ پہلی مرتبہ مولانا فضل الرحمان کسی حکومت کا حصہ نہیں، وہ حکومت میں ہوتے ہیں تو سب اچھا ہوتا ہے۔فواد چوہدری نے کہا کہ پاکستان کا 84 فیصد قرضہ پیپلز پارٹی اور مسلم لیگ(ن)کی حکومتوں کے ذمہ ہے۔ ہمارا سب سے بڑا امتحان ادائیگیوں کا بحران تھا، جو ختم ہوگیا۔انہوں نے کہا کہ مربوط پالیسی کیساتھ آگے بڑھ رہے ہیں۔ ملکی وقار بحال کرنا ہی ہماری حکومت کا بیانیہ ہے۔فواد چوہدری نے کہا کہ جشن عید میلادالنبی کے سلسلے میں ملک کے بڑے شہروں میں تقریبات ہوں گی۔ 12 ربیع الاول کانفرنس کا افتتاح خود وزیراعظم عمران خان کریں گے۔