زینب کے قاتل کی اہل خانہ سے آخری ملاقات کل
لاہور: قصور میں زیادتی کے بعد قتل کی جانے والی بچی زینب کے مقدمے میں مجرم عمران کی اپنے خاندان سے آخری ملاقات کا پروانہ جاری کردیا گیا ہے۔ حکام کے مطابق اہل خانہ سے عمران کی آخری ملاقات کل دن 12 بجے جیل میں کرائی جائے گی۔
جیل حکام کی ہدایات کے مطابق آخری ملاقات کے لیے آنے والے افراد کی تعداد 50 مقرر کی گئی ہے اور تمام افراد کے لیے قومی شناختی کارڈ اپنے ساتھ لانا ضروری قرار دیا گیا ہے۔ حکام کے مطابق عمران کو بدھ 17 اکتوبر کو علی الصبح پھانسی دے دی جائے گی، جس کے بعد میت صبح ساڑھے 5 بجے ورثا کے حوالے کی جائے گی۔
واضح رہے کہ 12 اکتوبر کو لاہور کی انسداد دہشت گردی عدالت کی جانب سے زینب زیادتی و قتل کیس کے مجرم عمران کے ڈیتھ وارنٹ جاری کیے گئے تھے ، جس کے تحت مجرم کو 17 اکتوبر کو پھانسی دی جائے گی۔
