سعودی عرب تاخیری ادائیگی پر پاکستان کو تیل دینے پر آمادہ

اسلام آباد: برادر ملکوں سعودی عرب اور پاکستان کے مابین دیرینہ تعلقات میں مزید بہتری آ رہی ہے۔ ذرائع کے مطابق سعودی حکومت کی جانب سے پاکستان کو 5 سال کی تاخیری ادائیگیوں پر تیل دینے پر آمادگی ظاہر کی گئی ہے۔ ذرائع کے مطابق گزشتہ روز دونوں ممالک کے درمیان ہونے والی بات چیت میں پاکستان کی جانب سے اُدھار تیل لینے کی باضابطہ درخواست کی تھی جس کے مطابق یومیہ 2 لاکھ بیرل اُدھار تیل 90 روز کے لیے دیا جائے۔ وفاقی وزیر پیٹرولیم غلام سرور خان نے تصدیق کی ہے کہ پاکستان نے 5سال تک تاخیری ادائیگیوں پر تیل مانگا ہے جس پرسعودی حکام آمادہ ہیں۔ غلام سرور نے کہا کہ گوادر میں آئل ریفائنری لگانے میں سعودی عرب دلچسپی رکھتا ہے اور ہم بھی یہی چاہ رہے ہیں۔ انہوں نے کہا کہ ریکوڈک پر بھی بات ہو رہی ہے اور سعودی عرب اس میں بھی دلچسپی لے رہا ہے۔ صوبوں سے اس معاملے پر بات ہورہی ہے ساتھ ہی پارلیمان کو بھی اعتماد میں لیں گے۔