سوشل میڈیا پر جعلی خبریں پھیلانے کا نوٹس

اسلام آباد... وفاقی وزیر اطلاعات چوہدری فواد حسین نے سوشل میڈیا پر منظم انداز سے جعلی خبریں اور نوٹیفکیشن پھیلانے کا نوٹس لیتے ہوئے کہا ہے کہ سوشل میڈیا کی آزادی کو متاثر کئے بغیر ہمیں جعلی خبروںکے خلاف سخت اقدام اٹھانے کی ضرورت ہے۔ وفاقی وزیر نے تحریک انصاف کی رکن قومی اسمبلی ملیکہ بخاری کا ٹویٹ بھی ٹیگ کیا جس میں ملیکہ بخاری نے بینظیر انکم سپورٹ پروگرام کے سربراہ کی حیثیت سے اپنی تقرری کی تردید کی ہے۔ وزیر چوہدری فواد حسین نے کہا کہ منظم انداز سے سوشل میڈیا پرجعلی نوٹیفکیشنز اور خبریں پھیلائی جارہی ہیں۔ یہ سلسلہ میڈیا ڈنر کی تصویر سے شروع ہوا اور اب اس طرح کی فضولیات جاری ہیں۔ ادھر ملیکہ بخاری نے اپنے ٹویٹ میں کہا کہ وہ دو ٹوک طورپر یہ بات ریکارڈ پر لانا چاہتی ہیں کہ انہیں بی آئی ایس پی کی سربراہ تعینات نہیں کیاگیا ۔ وہ زلفی بخاری کی رشتہ دار بھی نہیں ہیں۔ ملیکہ بخاری نے امید ظاہر کی کہ اب اس پر بحث ختم ہوجائے گی۔