اسلام آباد...امریکی محکمہ خارجہ نے وزیر خارجہ مائیک پومپیو کے دورہ پاکستان اور ملاقاتوں کی تفصیلات جاری کی ہیں۔امریکی محکمہ خارجہ کی ترجمان نے ایک بیان میں کہا کہ امریکی وزیر خارجہ پومپیو نے اسلام آباد میں وزیراعظم پاکستان عمران خان اور دیگر سول و ملٹری حکام سے ملاقاتیں کیں امریکی چیئرمین جوائنٹ چیفس آف اسٹاف جنرل جوزف ایف ڈنفورڈ بھی موجود تھے۔اعلامیے کے مطابق امریکی وزیر خارجہ اور چیئرمین جوائنٹ چیفس آف اسٹاف نے وزیراعظم عمران خان کو حکومت بنانے پر مبارکباد دی اور سول اداروں کو مزید مضبوط کرنے کے عزم کو خوش آئند قرار دیا۔امریکی وزیر خارجہ نے پاک امر یکہ تعلقات، مشترکہ مفادات کے شعبوں جیسا کہ دو طرفہ تجارت اور تجارتی تعلقات میں وسعت کی اہمیت کو اجاگر کیا۔ پاکستانی وزیر خارجہ شاہ محمود قریشی سے ملاقات میں پومپیو نے مشترکہ ترجیحات بشمول علاقائی امن و استحکام کے فروغ کے لئے پاکستان اور امر یکہ کے مل کر کام کرنے کے امکانات اور اہمیت پر تبادلہ خیال کیا۔اعلامیے کے مطابق مسلح افواج کے سربراہ جنرل قمر جاوید باجوہ سے ملاقات میں وزیر خارجہ پومپیو نے دونوں ملکوں کے درمیان انسداد دہشتگردی کے شعبے میں مزید گہرے تعاون کی امید کا اظہار کیا۔مائیک پومپیو نے اس بات پر بھی زور دیا کہ افغانستان میں مذاکرات کے ذریعے قیام امن میں پاکستان اہم کردار ادا کرسکتا ہے۔ پومپیو نے پاکستانی حکام کو یہ پیغام بھی پہنچایا کہ پاکستان کو خطے کے امن و استحکام کیلئے خطرہ بننے والے دہشتگردوں اور جنگجوں کے خلاف مستقل اور فیصلہ کن اقدامات اٹھانے کی ضرورت ہے۔
