نواز شریف اور مریم لاہور پہنچیں گے،استقبال کی تیاریاں

لاہور...مسلم لیگ ن کے قائد او ر سابق وزیراعظم نواز شریف نے پاکستان واپس آنے کا پروگرام تبدیل کر لیا ۔ اب نواز شریف اپنی صاحبزادی مریم نواز کے ہمراہ جمعہ کو لندن سے براہ راست لاہور پہنچیں گے۔ ذرائع نے بتایا کہ نواز شریف نے اپنی واپسی کا پروگرام پارٹی کے سینئر رہنماوں کی مشاورت سے تبدیل کیا ہے۔ گزشتہ روزماڈل ٹاون میں مسلم لیگ ن کے صدر اور سابق وزیراعلیٰ پنجاب شہباز شریف کی زیر صدارت اجلاس میں نواز شریف کا استقبال کرنے کے حوالے سے تیاروں کا جائزہ لیا گیا۔ اجلاس میں سابق وفاقی وزیر ریلوے سعد رفیق ،خواجہ آصف ،سینیٹرپرویز رشید ،مریم اورنگزیب ،پرویز ملک ،حمزہ شہباز ،خواجہ احمد حسان سمیت دیگر لیگی رہنما شریک تھے۔ اس موقع پر شہباز شریف نے کہا کہ سابق وزیراعظم نواز شریف کا لاہور پہنچنے پر فقیدالمثال استقبال کیا جائیگا۔ انہوں نے حمزہ شہباز کو نواز شریف اور مریم نواز کے استقبال کی تیاریوں کا انچارج بنادیا ۔ حمزہ شہباز شریف نے پارٹی کے ٹکٹ ہولڈروں کو استقبال کیلئے ہر صورت بڑے قافلوں کی صورت میں ائیرپورٹ پہنچنے کی ہدایات جاری کر دی ۔تمام پارٹی رہنماوں کو کہا گیاہے کہ وہ کارکنوں کو ہر صورت علامہ اقبال انٹرنیشنل ائیرپورٹ لیکر آئیں اور اپنے قائد و سابق وزیراعظم نواز شریف کا فقیدا لمثال استقبال کریں۔ انہوں نے کہا کہ عوام کے دلوں نے نواز شریف کی محبت کو نہیں نکالا جا سکتا۔ نواز شریف اصول پسند سیاستدان ہیں جنہوں نے عالمی دباو کو مسترد کرتے ہوئے پاکستان کو ایٹمی قوت بنایا تھا۔

 مزید پڑھیں:کمر درد کا بہانہ بناکر بھاگیں گے نہیں،مریم