کیا زرداری اتنے بھولے ہیں ..

 اسلام آباد.. سابق وزیراعظم نوازشریف نے سابق صدر آصف زرداری کے الزامات کو مسترد کرتے ہوئے کہا کہ زرداری کیچڑ اچھالنے اور تاریخ کو مسخ کرنے سے گریز کریں۔کیا زرداری صاحب اتنے ہی معصوم اور بھولے تھے کہ میرے ورغلانے میں آگئے۔ زرداری نے یہ بتایا کہ وہ میرے اشاروں پرچل رہے تھے تو وہ قوم کو آج یہ بھی بتادیں کہ وہ کس کی کٹھ پتلی ہیں۔ ایک بیان میںنوازشریف نے کہاکہ زرداری صاحب نے اصرار کیا تھا کہ مشرف کے تمام اقدامات کی پارلیمانی توثیق کردی جائے لیکن میں نے انکار کیا تھا۔زرداری صاحب نوشتہ دیوارپڑھنے کی کوشش کریں کیونکہ آج انکی جماعت دیہی سندھ تک سکڑ چکی ہے۔ میرا مشورہ ہے کہ بہتر ہوگا الزام تراشیوں کا دفتر نہ کھولیں اور اپنی توجہ انتخابات پر مرکوز رکھیں۔انہوں نے کہا کہ ہم نے حکومت کا حصہ بننے کے لئے مشرف کے مواخذے،ججوں کی بحالی اور سترہویں ترمیم کے خا تمے کی شرائط رکھی تھیں تاہم مشرف سے اختلاف کا مقصدیہ نہیں ہوناچاہیے کہ ادارے کی اینٹ سے اینٹ بجادی جائے۔ زرداری کو اینٹ سے اینٹ بجانے والے بیان پر اسی دن ناپسندیدگی کا پیغام بھیجا تھا۔ اسی بیان پر طے شدہ ملاقات منسوخ کر دی تھی۔ انہوں نے کہا کہ ا س وقت میں بڑے اصولی اور نظریاتی مشن کی جدوجہد میں مصروف ہوں۔ کسی سیاسی بیان بازی کا حصہ نہیں بننا چاہتا۔

مزید پڑھیں:نواز شریف نے ہر موقع پر ہمیں بیچا،زرداری