سیاسی مگر مچھوں کو شکست دیں گے،عمران خان
جہلم... تحریک انصاف کے چیئرمین عمران خان نے کہا ہے کہ سیاسی مگر مچھوں کو شکست دیں گے ۔ووٹ کا درست استعمال کرکے نیا پاکستان بنائیں گے ۔2018 کا الیکشن ملک کا مستقبل بدل دے گا۔جب تک زندہ ہوں ڈاکووں اور کرپٹ ٹولے کے خلاف جنگ جاری رکھوں گا۔جہلم اور پنڈ دادن خان میں کارکنوں سے خطاب کرتے ہوئے انہوں نے کہا کہ انصاف سب کے لئے برابر ہوتا ہے ۔ آپ کو جیلوں میں صرف غریب لوگ نظر آئیں گے ۔ ملک میں چھوٹا طبقہ امیر اور قوم غریب ہورہی ہے۔ ملک کو قرضوں کے دلدل میں ڈبو دیا گیا۔ 9 سال پہلے ہر پاکستانی پر 35 ہزار روپے قرضہ تھا پھرآصف زرداری اور نوازشریف کا دور آیاجس کے بعد ہر پاکستانی ایک لاکھ 30 ہزار روپے کا مقروض ہوگیا۔انہوں نے کہا کہ اوپر بیٹھے لوگ ملک کا پیسہ چوری کرکے باہر لے جاتے ہیں۔قوم کی دولت چوری ہوکر جب بیرون ملک جاتی ہے تو حکومتوں کو اخراجات پورے کرنے کے لئے قرض لینا پڑتا ہے۔ قرض کی قسطیں دینے کے لئے ٹیکس لگائے جاتے ہیں۔ چوری کوئی کررہا ہے اور قیمت عوام ادا کرتے ہیں۔ دنیا میں پٹرول کی قیمت کم لیکن ہمارے ملک میں اوپر جارہی ہے، ہر چیز پر ٹیکس لگایا جارہا ہے۔انہوںنے مزید کہا کہ ہماری نواز شریف اور آصف زرداری سے ذاتی لڑائی نہیں، ہماری جنگ ڈاکووں اور چھوٹے سے کرپٹ ٹولے کے خلاف ہے۔ انہوں نے کہا کہ نوازشریف کا تو کیوں نکالا ہوگیا ۔ اب ان کی جگہ چھوٹے بھائی جونیئر ڈان باری لینے آئے ہیں۔کیا شہبازشریف حبیب جالب کے شعر پڑھ کر ملک کو لوٹیں گے؟انہوں نے کہا کہ ملک میں مزدور اور کسان کے پاس علاج کے لئے وسائل نہیں ۔کسان کو اپنی فصل کی پوری قیمت نہیں ملتی۔ یورپ میں غریب آدمی کے بچے کو بھی مفت تعلیم ملتی ہے۔ وہاں انصاف کے ادارے مضبوط ہیں جو کمزور کسان کو طاقتور کے مقابلے میں انصاف دیتے ہیں۔ اس لئے وہ ہم سے آگے نکل گئے۔ برطانوی وزیراعظم منی لانڈرنگ میں پکڑا جائے تو کبھی نہیں کہے گا کہ کیوں نکالا۔وہ اپنا جرم قبول کرے گا۔ پاکستان میں ڈاکو کبھی صدر تو کبھی وزیراعظم بن جاتاہے۔ انہوں نے کہا کہ جوتے کوئی اور مار رہا ہے (ن) لیگ بدلہ تحریک انصاف سے لے رہی ہے۔میں یہاں کھڑا ہوں۔اگر (ن) لیگ کا کوئی کارکن یہاں موجود ہے اور جوتا مارنا چاہتا ہے تو بتا دے۔انہوں نے کہا کہ نوجوانوں کے مسائل کا حل اپنے منشور میں شامل کریں گے۔زیادہ سے زیادہ نوجوانوں کو تحریک انصاف کا ممبر بنانا ہے۔
