لیموں کو زمانہ قدیم سے حسن کی افزائش کے لیے استعمال کیا جاتا ہے ۔ اس کے جلد پر استعمال سے ڈھیلی جلد سکڑ کر ٹائٹ ہو جاتی ہے ، کھلے مسام بند ہو جاتے ہیں اور سانولی رنگت نکھر جاتی ہے ۔ لیموں چکنی جلد کے لیے اکسیر کا کام دیتا ہے البتہ خشک جلد کے لیے اس کا استعمال مناسب نہیں ۔ ایک کھانے کا چمچ عرق گلاب میں ایک چائے کا چمچ لیموں کا رس ملا کر اس سے چہرہ صاف کریں ۔ اس مکسچر کو گردن اور کہنیوں پر بھی لگائیں جلد صاف ہو جائے گی ۔
دھوپ سے پیدا ہونے والے داغ دھبوں کے لیے دہی سے بڑھ کر بھلا کیا ہو سکتا ہے ۔ ایک چائے کے چمچ دہی میں ایک چٹکی زعفران شامل کر کے چہرے پر لگائیں ۔ روزانہ دہی کے استعمال سے داغ دھبے دور ہو جائیں گے اور چہرہ نکھرا ہوا شاداب نظر آئے گا ۔
چہرے پر پڑنے والے داغوں سے نجات حاصل کرنے کے لیے جائفل کو دودھ کے ساتھ رگڑ کر یا پیس کر چہرے پر لگائیں ۔ یہ عمل ہفتے میں چار بار جاری رکھیں ۔
