اسلام آباد.. تحریک انصاف کے سربراہ عمران خان نے کہا ہے کہ عدالتی فیصلوں پر تنقید کرنے والے قوم و ملک کی خدمت نہیں کررہے بلکہ اداروں کو کمزور کرنے کا باعث بن رہے ہیں۔ٹوئٹر پربیان میں انہوں نے کہا کہ عوامی عدالت سے رجوع کرنے کی آڑ میں عوام کو بیوقوف بنانے کے لئے شریف باپ اور بیٹی کی جانب سے ریلی کے نام پر رچایا جانے والا تماشا اب بند ہونا چاہیے۔انہوںنے کہا کہ ہر کوئی جانتا ہے کہ دنیا بھر کے جمہوری ممالک میں عوام ووٹ کے ذریعے اپنے نمائندے منتخب کرتے ہیں مگر انصاف کی فراہمی عدلیہ ہی کی ذ مہ داری ہے۔ اسی طرح ریاستی ادارے کرپشن کا کھوج لگانے اور کرپشن کو بے نقاب کرنے کے پابند ہیں۔ شریف خاندان کی منطق ہے کہ جو ایک مرتبہ ووٹ لے کر آجائے وہ قانون سے بالاتر اور ہر قسم کی باز پرس سے مبرا قرار دے دیا جائے۔انہوں نے مزید کہا کہ عدلیہ اور عدالتی فیصلوں پر تنقید کرنے والوں کو جنوبی افریقہ کی طرف دیکھنا چاہئیے جہاں افریقن نیشنل کانگر یس نے کرپشن کے الزامات پر اپنے لیڈر زوما کو گھر بھیج دیا ۔ اسرائیلی وزیراعظم نتن یاہو کو بھی کرپشن کے الزامات پر پولیس کی تفتیش کا سامنا ہے جس سے ثابت ہوتا ہے کہ کسی کا ووٹ لیکر منتخب ہونا اسے قانون سے بالاتر نہیں بنا دیتا۔
