ووٹ کا تقدس بحال کرنا ہے،نواز شریف

  لاہور...سابق وزیراعظم نوازشریف نے کہا ہے کہ مخالفین نے منافقت اورجھوٹ کی سیاست کی ہے۔عمران خان نے سیاست کوخراب کیا اورگالی گلوچ کا کلچرمتعارف کرایا۔ لودھراں کے ضمنی انتخاب کا جونتیجہ آیا وہ کوئی سوچ بھی نہیں سکتا تھا۔ دل چاہتا ہے کہ لودھراں جاکر وہاں کے عوام شکریہ ادا کروں۔لاہور میں میڈیا سے گفتگو کرتے ہوئے انہوں نے کہا کہ ووٹ کا تقدس ہونا چاہیے۔ہمارا بیانیہ لوگوں کے دلوں میں گھرکرچکا ہے۔ ووٹ کا تقدس بحال کرنا ہے اوریہ پیغام ہمیں ملک بھرمیں پھیلانا ہے۔انہوں نے کہا کہ گالی گلوچ اورالزام تراشی کی سیاست کرنے والوں کو صادق اورامین قراردیا گیا اورہم جوعوام کی خدمت کررہے ہیں انہیں گھربھیج دیا گیا۔ اب عدالتوں میں بیٹھے ہوئے منصفوں کو بھی سوچنا ہو گا کیو نکہ وہ اللہ کا سامنے سب سے زیادہ جواب دہ ہیں۔انہوں نے کہا کہ میرا پیغام عوام کے دلوں اور ذہنوں تک پہنچ گیا ۔ملک میں 70سال سے ووٹ کا احترام نہیں۔ووٹ کے تقدس کا پیغام کونے کونے تک لے کر جائیں گے۔ عوام کے مینڈیٹ کا احترام سب کو کرنا چاہیے ،تب ہی ملک آگے بڑھے گا۔