دہشت گردی کیخلاف جنگ میں123ارب ڈالر کا نقصان اٹھا چکے،پاکستان

اسلام آباد...ترجمان دفتر خارجہ ڈاکٹر محمد فیصل نے کہا ہے کہ پاکستان نے دہشت گردی کے خلاف جنگ میں افسران اور جوانوں کی قربانیاں دی ہیں۔اس حوالے سے پاکستان کی شہادتوں کی شرح پوری دنیا میں بلند ترین ہے۔ ایک بیان میں ترجمان نے کہا کہ پاکستان نے انسداد دہشت گردی میں اپنے 75 ہزار شہری اور 6 ہزار سپاہیوں کی قربانی دی ہے۔ دہشت گردی کے خلاف جنگ میں پاکستان کو اقتصادی طور پر 123 ارب امریکی ڈالر کا نقصان اٹھانا پڑا۔ترجمان دفتر خارجہ نے مزید کہا کہ پاکستان، تحریک طالبان افغانستان اور حقانی نیٹ ورک کے کسی بھی مشتبہ عناصر کو افغانستان کے خلاف کسی بھی دہشت گردی کے لئے اپنی سرزمین کو استعمال سے روکنے کی کوششیں کر رہا ہے۔ نومبر 2017 میں تحریک طالبان افغانستان اور حقانی نیٹ ورک سے تعلق کے شبے میں 27 افراد کو افغانستان کے حوالے کیا ہے۔