پشاور... پیپلز پارٹی کے چیئرمین بلاول بھٹو زرداری نے کہا ہے کہ ن لیگ اور تحریک انصاف صرف ذاتی مفادات کی سیاست کرتی ہیں۔ دونوں نے اخلاقیات کا جنازہ نکال دیا ۔عمران خان ہر ہتھکنڈا اختیار کرکے اقتدار میں آنا چاہتے ہیں۔ اتوار کوپشاور میں کوہاٹ روڈ پر پیپلز پارٹی کے جلسے سے خطاب کرتے ہوئے انہوںنے کہا کہ سیاست میں جتنا گند عمران خان نے پھیلایا اس کی کوئی مثال نہیںملتی۔ عمران خان امپائر کی طرف دیکھتے دیکھتے اپنی بینائی کھو بیٹھے ہیں۔ اس انتظار میں ہیں کہ کب امپائر کی انگلی اٹھے اور ناچنا شروع کردیں۔ عمران خان دوسروں پر الزام لگا کر خود کو معصوم ثابت کرنا چاہتا ہے۔ خان صاحب بتائیں آپ کے صوبے میں کون سی تبدیلی آئی ہے۔ کے پی میں ان کی ناک کے نیچے کرپشن ہو رہی ہے۔ بلین ٹری منصوبے سے ہریالی تو نہیں آئی البتہ ان کی جیبیں ضرور بھر گئی ہیں۔انہوںنے کہا کہ جس شخص کو اپنی زبان پر قابو نہیں وہ اس عظیم قوم کی کیسے رہنمائی کرسکتا ہے۔ انہوں نے کہا کہ نااہل میاں صاحب کی حکومت نے عوام کو دھوکا دیا۔وہ اس وقت تک کرسی سے چمٹے رہے جب تک عدالت نے انہیں نااہل نہیں کیا۔جیسے میاں صاحب کی ترقی دھو کہ ہے اسی طرح خان صاحب کی تبدیلی جھوٹ ہے۔ انہوں نے کہا کہ پیپلز پارٹی نے پختونوں کو شناخت دی۔ عوام ضمنی الیکشن میں سوچ سمجھ کر فیصلہ کریں۔ نااہل وفاقی حکومت صرف پروپیگنڈہ کرنے کی ماہر ہے، کوئی ایک طبقہ بتا دیں جو اس حکومت سے خوش ہو۔ مزدور بے روزگار پھر رہے ہیں۔کسانوں کو فصل کی قیمت نہیں مل رہی۔ مہنگائی آسمان کو چھو رہی ہے۔
